2018 1st ZCBA Youth Conference in Atlanta, Georgia
Theme for 2018 Youth Conference, “Let no one despise your youth, but be an example to the believers in word, in conduct, in love, in spirit, in faith, in purity. 1 Timothy 4:12” Created by ZCBA Media Team
Masaty lanze hynh hawte ccungccaw nynh thyaahawnaw te thawzung te cyikho lei paw Yn pangkhaetu Bawipaw Aming thehoynaw um sah!
Vae (1) ZCBA Youth Conference tuh Bawipaw mingte lungtua te September 2, 2018 kya kae thangsah vae. Aho abou ccangkheit sangkaw ah um lei lante oun do-oihtu hae te, Vae (1) Naw Youth Conference oun tuapya paw Georgia Zotung Baptist Church tungvaw kya lungtuanaw alepi kae hoi. Bawipaw nynh nae khriccawbuu kya khua nah khangkunaw oh te rya nah law paw miakaw kya hythuanaw koukou Ae pya vae oh sah.
Vaeram (Myanmar) lante kopaw ZCBA Youth Conference kya Pachia bya te thawzung yn pyapaw Rev. Ngun Lian tungvaw zema lungtuanaw alepi kae hoi. Youth conference kya Rev. Ngun Lian nynh oun ccangpyapaw ccangkheit tuh “dosuinku paw thuanaw lan dosuinku lanpaw hoitou” ahoitu thua aho, cite a ci.
Youth conference kya a tawku oh paw, “Na kum ano keiccuze hum nynh san ae la dothatheih nan sah; thausalama nang tuh bya kya, ozia kya, sungsakunaw kya, zynnaw kya te thyaapapingnaw kya zyntu hae nynh dosuinkupaw la thua” 1 Tim. 4:12, nynh oun hopya thyhawte ano ccyhlya hynh zyntu hae te accangpaw cccungccaw Pachia nyh leipaw hae nynh a dosuinku paw lah thua oh sih.
Zyngtu mino hae nynh a hiinnaw kya dosuinku lanpaw ahoitu thua kho naw lan Pachia bya te lah ciaku oh sih lah Jesu Khri muingsang kha a hiinnaw kya lah langsah ku oh sih.
Atunin kum Vae (1) Naw ZCBA Youth Conference tuh Bawipaw nynh hythua kou Yn pya zah Vaeram (Myanmar), Matupi kya umpaw Zotung Baptist Church pastor Rev. Thawng Za Ting mah Vae (4) Naw ZCBA EC meeting oun khaezah conference kya mino hae mah thawzung oun pya keiccuze Rev. Thawng Za Ting tungvaw lungtuanaw alepi kae hoi.
Zotung minphuin kya Pachia nynh hythuanaw oun pyazah Zotung minphuin hae ram thungnaw kya athua bua vae oh. Thuasalama ah bang ah Zotung ccawno hae tuh Vae bya te Zotung bya “ahoy te” a thaethya leipaw mah koukou ae lung vae. Tukeiccuze hynh e ccawno hae Mihraw te Zo bya te Pachia bya accangkho lanpaw hynh kou apeki oh.
Pachia hythuanaw liate U.S. kya Baebu siainn kaepaw Song Christ (Evangelist Thang Le Ccing) zemah Youth Conference Mihraw te Zotung bya Pachia bya oun ccangkho pya keiccu atungvaw kya lungtuanaw alepi kae hoi zah Bawipaw Pachia Aming kou kae thehoysah.
Evangelist Song Christ Thang (Thang Le Ccing) tuh muihsaw zo hae paw hanlan kah hiinnaw ka mang cih a cithyh hawte ZCBA nynh Vae (4) Naw ZCBA EC meeting tuanaw kyate ZCBA evangelist lan cite EC nynh lung ngin te nawccawnaw ahoi hae.
Sunday, September 2, 2018 Vae (1) Naw ZCBA Youth Conference, GA kya ZCBA GS Rev. David Van Dawt Bik nynh Song Christ Thang tuh sawsang pyate ZCBA masaty evangelist lan Bawipaw kalan ah ap.
ZCBA tuh Bawipaw nynh hythua pyazah 2018 kum kya Iowa Zotung Baptist Church nynh akopaw Rev. Ram Kung tuh Bawipaw ming te ae thua kho vae.
Rev. Ram Kung tuh Vae (4) Naw ZCBA EC Meeting kyate EC nynh ZCBA ministry lukheit athua bua vae cipaw nawccawnaw ahoi hae.
EC nawccawnaw hoi thyhawte Vae (1) Naw ZCBA Youth Conference kya Sunday, September 2, 2018, GA kya ZCBA GS Rev. David Van Dawt Bik nynh Pachia kalan sawsang pyate ah ap.
By ZCBA Media Director: Ha Tha
